11
MARY WINCHESTER MAN THU: A semi-first person account

THUHMAHRUAI:

He thuziak hi lehkhabu pakhatah ka hmu hlawl mai a. A ngaihven tana a dangdaih ve em avangin ka rawn share ve tawp che u a ni e. A ziaktu phalna pawh ka la lem lova. Mahse kan thenawmpa hlui a ni bawk a, a huat ka ring lem lo. A huat tak viau leh Alex-a an tia mawni kha kan puh leh jeih anga a ni mai. Digital media-a dahthat ve tlak niin ka hria. Pu L.N. Tluanga hi pa titi thiam, hawi zau, YMA President leh MLA pawh lo ni tawh a ni a. Mihriathlawh tak, Pi Zaithanchhungi pasal a ni.

Sei deng deng bawk a, save hmak a, a hnua chhiar mai chi a nih hmel.

 

KA PUTEN MARY WINCHESTER AN MAN

L.N. Tluanga, Hope Lodge, Electric Veng, Aizawl.

 

KHUHHAWNNA:

Ka pu, Dokhara chu Vailen hmaa Mizo nunphung leh ziarang hre phak a ni a. Sailo lal, ni leh thla kara lengte’n thuneihna sang ber (sovereignty) neia ro an rel laiin a tleirawl ve tawh a ni.

Mizo lalte hian an khua leh tui hi an ta neih tak zet a, an chunga thu nei lehchhawngtu an awm lova, thu chhia thu thaah thuneihaa sang ber an nei vek a ni. Lal tawrawt deuh phei chuan an khua leh tuite thil neih an it zawng chu an nawma an makin an chhuhsak bawk thin. Thi tha deuhte chu Lal hmuhah an awrh mai mai ngam lova, chhe deuhte chu 'Lal hlau lo thi' an ti a. Nau hming an sak dawn pawhin hming ropui leh tha deuh chu an pu ngam mang lova, “Lal hming sakna a dal a nge,” an ti chawk a ni.

An khua leh tui zinga mi chanhai leh chhumchhia deuhte chu an ngaihsak em em thung a, hakchhamte an awm chuan a nei deuh ta lak sakin an pe thin. Ka pu chu Sailam 'Bengkhuaia Sangkhua' an tih thin chu a seilenna a ni a, Sailam chu Sialsuk leh Thenzawl inkara awm a ni a, zo veh vawh tak a ni. Mizoram khaw lian berah an ngai a. Sang khua lai chu tam an inti ve khawp mai.

Chung hun laia an ngaihsan leh an inelna ber chu tlawmngaih leh huaisen a ni. Mi leh sa ral beih pawh an hrat reng a ni. Buh ngah thei leh sa kap thei hi an ngaisangin an chawimawi thiam bawk.

Sai ram chhuakte phei chu thla khat lai pawh an thang thin a, mi an la tlemin lal ram hi a zauva, ngawpui lah a thain ramsa pawh a tam bawk a, sapel hi an chak em em thin a ni. An ti ti tem ber chu lal leh pasaltha leh sakah thu leh thlawhhma chanchin a ni.

Thatchhia hi an ngaithei der lova, nula tlangval hnathawk lova awm chu Lal emaw, upain emaw, “I dam nange,” an han tih meuh chu tuar har an ti hle.

Hmeichhe uire hi an lungten tak zet a. Ka pu hla hriat hmasak pakhat chu —

Ka nau Sawmthang, dam reng la,

I nu uire kal re re,

Tui nuamah chingal bur a khai nel nel,

tih hi zu ni mauh va.

 

MARY WINCHESTER MAN THU:

Vailen (1872) kan tih hi kum za a lo tling reng tawh mai a. An lo len chhan chu Mizo-ho hi an ralhrat si a, mi an that fo mai a, tuk daih a, awp beh tul an ti a ni. Mizo lah chuan an sai ram pelhna an nek chep chu an ngaithei bik der silo. Bengkhuaia Sang khua pawh chuan Cachar leh Mizo ram inrina phaizawl velte khu an sai ram chhuahna a ni phak si a. An sai ram chhuahna nek chepa thingpui huante chu hnawk a ti tlat a ni.

Chuvangin Sailam khua atang ngawt pawhin Vai run turin tum thum(3) ngawt an thawk chhuak a ni. Ka pu chu ralkai tirte chauh a la ni a, a naupang ber pawl a ni reng a. Tlawng dung zawhin buhfai tukkhum tawng phur theuhin Vai run turin an chhuak a, hei hi a tum thumna a ni tawh a. Pasaltha hova tlangval sang rual an thawk chhuak chu tuma do zawh rual loh leh hneh rual lohvah an inngai a, hlauh reng an nei lo.

Tlawng dung zawh zelin phaikin an zu thleng a, kawrchhe mau la te pawh an hmu nual tawh a. Thangtharin Vai kan tih hi an ni chuan ‘kawrchhe mau la’ an ti a, an hmuh apiang mai chu bak lengin an tlanchhe dawr dawr zel mai a. Tiaupho zau laiah chuan buk an zar a, riahhmun an khuar a. Tlangval huaisen sang rual chu an riak nghuk mai a, puan pakhat bak sin an awm lo.

Tlangval pakhat chuan tiauphovah chuan thirzai tle vir ver, inkual rim rem hi a chhar nawlh mai a. A thiante nen chuan an bawr laih laih a. An han pawt chhin thin a, a fei phian mai si a. An han elhtliak dawn a, a nel zek bawk si. Thangtung angin a dum ve si lova, lian lam awm chuang lovin a intia zei bawk si, a bul lam lah a hriat chuang bawk si loh, a sei phian bawk si a, mak an ti em em mai a.

Patlingho nen chuan an bawr ta laih laih mai a, "Eng tak ni ang maw?” an ti a. 'Valupa chuan tlangval-ho chu meipui a chheh tir a, mei vamah chuan thirzai chu a han rawh ta a. Rei loteah chuan a tle chu a kang ral a, a lo ling sen ta vat mai a. Valupa chuan a han thur chhuak a, tuiah a han chiah ta a. Thirzai chu a bung nual a, an han elh pawh chuan a tliak ta rep rep mai a. Chu veleh Valupa chuan, "Hm, an dawi kan hal chhe ta, kan kawrchhe mau la ho hian, 'Ka dawi e,' te min ti vei maw!" a han ti lar lar a, a hmuihmai a lek rinawm thiam bawk a, a hlim nasa mai si a. Ka pui sawi dan takah, "Keini tleirawl ho chuan kan thlamuanpui nasa mai a. Ral beih chu kan chak zek zek mai a, min lo bei ngam hi awm se kan ti tak zet a ni," a ti.

Ka pu vek chuan, "A ril lam kan pan zel a, phaizawl zau em em te kan hmu a, mak kan tiin hmuhnawm kan ti khawp mai a, 'Champhai zawl an tih nen hian a enge zau ang le’, ti tein kan han sawi nak nak a. Kawng zau pui pui kan hmu a, thing chi khat, hniam te te, tawi bim bem, tlim dul te hi kan hmu a (thingpui huan a ni awm hle mai-LNT) An sam fai angreng pian bawk si a, kan mit a la khawp mai. Tlangdungah chuan di leh rap In chhete te chauh kan hmu a, mahse phaizawlah chuan In lian pui, sen vet vut te kan hmu a, kan lal In aia lian leh ropui zawk niin kan hria a, a bul ngeia hmuhte chu kan chak nasa mai a. Tleirawl-ho chuan kal zel mai kan duh a, mahse Valupate’n chin tawk min neihpui tlat mai a, riahbuk lamah min letpui leh daih thin a….," a ti.

“Tumkhat chu buk nghak tur tawk an ruat a, pawl hrang hrangah min then darh a. Hotute min hruaina lamah chuan kan liam sang sang a. Ho khat chuan Mingo-ho awmna hmun zau pui mai an va pawh a (tuna Alexandrapur khu a ni ang chu-LNT) Mingo-ho chu an um chiam mai a, pakhat chu an that a, hmeichhe naupangte kum thum vel mi lek, ngo ver chu an rawn man lehnghal a. Chutiang vun ngo chu kan la hmu ngai si lova, kan bawr luih luih mai a, a meng paw ram mai a, a sam lah chu a sen ther bawk si a, kan hmu duh hle mai. Chu an ral man leh thah chu an duhtawk a ni teh chek ang chu, hotute chuan haw an rawt ta a.” Vunngo naupang chu Zoluti tiin an vuah a, a hming dik tak chu Mary Winchester a ni. Zoluti an man ni chu January 23, 1871 a ni.

Sailam khua an luh dawn chuan lamtham an lo tir hmasa a, lalnu hovin khawtlangin mi!u leh ral man chu an !o hmuak a, zu leh sa a tam zet mai. Zoluti chu an hmu duh em em vek mai a, hlau leh thlabar ngaihna pawh a hre tawh chuang lova.

Ka pu pa, Kawlchuailova chu lal upa min a ni ve a. Sap naupang Zoluti chu a hnenah an dah a; mahse ni tlemte chauh an awmpui hman a lalnuin a chhuhsak ta a. Lalnu chuan Zoluti chu a duat hle a, a bulah a muttir a, Mizo thawmhnaw leh inkhualtelemna chu a kim biaiin a siam sak a.

Chutia lalnuin Zoluti ka pa pa In atanga a la mai chu a lo ngaithiam chiah bik lova, “Kan awmpui peih lo pawh a ni si lova, khawtlang hmaah min timualpho ve," tiin a lung nilo a. Chumi thawm chu Vaphai Hualngo lal chuan a lo hre ve a, "Kawlchuailova chu mi huaisen leh lal upa min a ni a, kei hian ki mamawh a nj, Pawi ral dep ka ni bawk si", tiin a upate hruaiin Sailam-ah chuan a kal a, ka pute chhung chu a khua leh tui atan a sawm thlu ta der mai a.

Khuantevikah pem tur chuan an inphur chhuak ta a. Kawtchhuah an va thlen chuan Sailam lalnu chu kawng laiah a lo ding teu mai a, "Ka upa duh ber min chhuhsak thei lovang..... " tiin a lo ui a. Vaphai upa chuan thiam takin a han dil zui a. Ka pu pa chuan, "Kan laklawh tawh bawk a, min liam tir mai rawh, kei tehlul min han ui chu a va han zahawm tehlul em....!"a lo ti bawk a. Lalnu chuan, "Chuti a nih chuan min hnutchhiah bik lovang, ka hovin i pem law law ang u," a ti ta daih mai a. Chutah Vaphai lal leh a upate chuan duap an kaih ta a. "E, kan thiam lo a ni, i upa duhlai laksak kan tum hi chu kan ti dik lo chhiava a ni e, min ngaidam rawh," tiin thupha an chawi ta a, an inhruai kir leh ta nge nge a.

 

MARY WINCHESTER LAK LET THU:

Zoluti chu kum khat chiah Sailam-ah chuan a awm hman a. Tichuan chhim lam atangin Mizovin Thangliana an tih (Tom Lewin) leh a hote chu Zoluti lakir leh tur chuan an lo thawk ta rup mai a. Tuna Chhipphir khua saw an inkulhna hmun a ni. Bengkhuaia Sangkhua pasalthate chu a pawng a takin an zuam bik lo pawh a ni ta ve ang, thiam thil (Diplomacy) hmangin Bengkhuaia chu an vehthlem a, vawi tam an inbiak hnuah chuan inbiak rem dan kawng an hmu ta a ni ngei ang, LAU luiah sawn inhmuh an an rawt ta a.

LAU lui kamah chuan Bengkhuaia leh Thangliana chu an inbe ta a. Thangliana chuan, “Hla tak atangin kan lo kal a, unauva siam che kan duh a ni." tiin a han tan a. Bengkhuaia chu a lawm em em mai a, "Unau atana min zawng chu ka hnar ngai lovang, he LAU lui hi a lehluan hma loh chuan kan inunauna hi ka sut lovang," a ti ta hial a. Kut suih meuhin Thangliana chuan chibai a buk a. Bengkhuaia chuan a thlah mai duh lovin, "Unauah kan insiam ta a, kan thuthlung chu ran thisenin kan nemnghet tur a ni," a ti a. A lo inrinlawk angin sechal chu a han kaih chhuah tir ta ruau mai a. An lawm tlang ngei mai, Saui an tan a. An inrem dan chu, ‘Bengkhuaia chuan Zoluti chu a pekir leh ang a, sipai-ho chuan Bengkhuaia leh a khuate chu engtin mah an tibuai bik hek lovang,’ tih a ni. Tichuan hlim takin LAU luiah chuan ruai an kil ta a.

Zoluti an la let leh tur chu an ui hie mai a, a pi phei chuan a ui leh zual a. A khuate hmuh laia tap chunga an la tur chu a ngaingam ngang lova, rem a ruat ta a. A remruat ang chuan Zoluti chu thing phur turin a chhuahpui a, a thawmhnaw leh inkhualtelemna zawng zawng chu a kensak vek a. Zoluti reuh chuan, "Ki pi, engatinge heng zawng zawng hi kan ken kher a?" tiin a zawt khauh mai a. A pi chu a hrilhhai viau nain chhanna a hai bik lova, "Ramhnuaiah kan inkhualtelem dawn nia," a ti then a, a chhuahpui ta a. Ramhnuai an thleng a, "Chemte, tah hian lo awm la, thing kan fawm zung zung ange," a ti a, a kalsan a. A hmuh phak loh a thlen veleh sipaiin Zoluti chu an man ta a. Tap tuar tuar chungin, "Ka pi min chhan rawh, miin min man," a ti vau vau va, chumi ni chu January 21, 1872 a ni.

Zoluti chuan Zotawng a thiam hman a, London khawpuiah a cheng a, tar tak a nih tawh hnuah Pu Ch.Pasena leh Rev. Challiana te’n an zu hmu a, Mizo thil, a piin a siam sakte chu a lo la kawl vek a. Zoluti an kawlna hmun thuah hian Thenzawl nge Sailam tih hi a ri ta nual a. Ka pu-in a sawi ka hriat ang chuan Saiiam ti vekin a sawi thin (Matric result ka nghah laiin ka pu dam lo hi thla khat lai ka bawihsawm a ni-LNT )

 

TLANGKAWMNA:

Ka pu chu tar a nih tawh hnuah thiante zinga a ti ti lai ka hriat reng chu, Vai runa an kal khan an ni tleirawl-ho chuan kal zel an duh a, hlauh tur reng an hmu si lova. Mahse an kawng, in leh lo leh sulhnu an hmuh khan valupate chuan ngam loh leh tluk loh tur mihring an awm an lo ring a ni ang tih ka ring ta e, tiin a sawi thin.

Ka pu chu Sapin Zoram an han awp chuan tlangval puitling a lo ni ve tawh a, kuli a zing em em mai a. Aizawl-Lunglei ngawt pawh sipai thuam phurin vawi 3 a kal a. Tum khat chu mi 14-an kal a, mahse phur 15 an lo siam si a, sipai chuan an hrawk nasa mai si a, an phur siam sa chu an hai darh ngam bawk si lova. Ka pu chuan phur hnih chu a bitum ta ngawt mai a, "Lunglei chu thiante rualin ka thleng ve tho e," a ti.

Nikhata a kal thui ber a sawi chu Kulikawn atangin ni chhuah rual chiahin a chhuak a, Serchhip tlang sang laia an khua Kawlri chu ni tlak rual chiahin a thleng a. Lamlian awm hma a ni si a, kal chak a inti hle.

An tlangval lai chuan Mizo tih hi an hre zauh zauh chauh va, "Vai sipai leh Babu-ho hian hmusit tak leh deuhsawh chungin 'MIZO' min ti thin a, kan haw thei hle thin," a ti bawk. Ka pi Hauthuami pawhin, "Kan naupan laiin Mizo tih hi kan hre ngai lo. Tun hnuah hian Mizo hnam in ti ta si a, hmanlai chun Lusei, Ralte, Paihte, ….. tih hlirin hnam hming kan sawi thin," a ti bawk.

Mak angreng tak chu Vailen hma daih hian Mizo pakhat chuan Vai nupuiah a nei tlat mai zu nia. Ka pi chuan an naupan lain chu Vai chu a hmu ve ngei a, "Mosolmani kan ti mai,” a ti a. Aizawl kan luhpui hnuah a sawi leh a, a ngaithlatu putar ve bawk chuan a lo hriat zawng tak a ni a. Chu Mosolmani chu a pi a lo ni reng mai zu nia. Tunah hian an thlah zelte chu Dawrpui Veng-ah an cheng. Ka pi chuan Electric Veng-a kan In hi min luahpui hman a ni.

Ka pu chuan District Council Member thlan hmasak ber, kum 1952 khan vote a thlak ve hman a. Mizoram lal-ho an tlawm dawn tihte kha a ri zing si a, an thiante nen an sawiho ve a, "Chutia lal an tlawm tak tak chuan Lalluaia te, Saitulera te, Kamliana te meuh pawh keini michhia ang hian fathang ei lovin an awm ve mai mai anga maw?", an ti a. Ni leh thla kara leng meuh tlawm tur chu mak an ti takzet a ni.

_______________________________

 

 

 

 

 

 

< ="http://lawrkhawm.com/ ?kk=10">
 

Who Voted

27 comments

Written by alexxfender, 2043 days permalink
0
0
Min han sawi rik tel hram chu le...
A thrat hmel khawp mai.. ka hman veleh kan chhiar ve khiah ange..
dultea chuan kum 10 liam ta khan a lo chhiar leh daih tawh ang chu..
Written by amuana, 2043 days permalink
0
0
Nang a pawh chu min sawi tel ve leh hram tho bawk a. Keipawh ka hman veleh ka chhiar ve ange. Tawia chuan Kutphah mawi tih a tel lo em a a chhiar peih lo mai thei. He thil hi angaiha upload a ni mai thei bawk. :)
Written by Mozart, 2042 days permalink
0
0
Nia.. Tuemaw chuan a kutziakin a hmu tawh ngei ang.
Written by Angaiha, 2041 days permalink
0
0
Min han sawi rik ve tel hram chu le...
Written by moimoi, 2043 days permalink
0
0
Ka'n vote phawt ang a, nakinah ka ron soi belh ve ang e...
Written by bcole, 2043 days permalink
0
0
a dik save hmak a, a hnua chhiar chi. Virgochhas te tan lo chuan chhiar chhuah peih chi ni leu :P
Written by virgochhas, 2043 days permalink
0
0
nang a pawh chu min soi lan ve kher le...

ka chhiar peih rih lo...
Written by Dave, 2043 days permalink
0
0
History lam a tui mi tan chuan a ngaihnawm viau ang. Tin thil tha tak pawh a ni.
Written by Aryan, 2043 days permalink
0
0
A lo in sawi lut ve ringawt e. Ani lo pawh hi Mary Winchester man tu Pasltha thlah te ni a in chhal Hortoki ah an awm.
Written by Blueberry, 2042 days permalink
0
0
Haha!!
Written by dula, 2042 days permalink
0
0
zoluti mary winchester chu bawngkawn lam pang veng ah zaithiam a awm thin kha :))
Dultea nau pawh Mary chu a awm in ka hria ...!!
Written by PureLeader, 2042 days permalink
0
0
Ka hriat sual loh chuan Tluanga (shuala) te 'in-laws' inah a thlalak chu ka hmu ve tawh tlat mai...
Written by dula, 2042 days permalink
0
0
i hriat dik ka ring...Rev challiana thuziak ka chhiar ah pawh..england ram ah inkhawm naah thu a sawi a..mary winchester chanchin a sawi chhuak a..inkhawm ban ah mary winchester chuan a rawn chibai thu leh alo inkhawm ve thu a ziak ka chhiar tawh tlat..
Written by PureLeader, 2042 days permalink
0
0
- An han chhanchhuah naah sap hovin an han hmuh khan, a lo in kawibah anti ni lawm ni?
- Sai ngho bengbeh te anlo beh tir?
- Mary Winchester khan Mizo bula a awmlai chanchin Mizo tawngin (chipchiar deuhin) lehkhabu ziah a nei?
- Mizo ho an balh zia te a han chhanchhuak tu te khan an sawi nasa?
Written by Blueberry, 2042 days permalink
0
0
BW, tak tak maw? Lo ngaihven teh a thlalak chu...te han ti ngawt ila, i peih chuan.
Written by Blueberry, 2042 days permalink
0
0
Ouch... kan tihsual zeuh chu. Chawkreh nawk nawk!!
Written by PureLeader, 2042 days permalink
0
0
aw tak2 ni e, Aizawl ah ****i nu in an album min hmuh in "hei hi Mary Winchester ania...". A chanchin hi ka lo hre ngai lova, a chanchin ka hriat phah nual alawm. Kan in contact lohna rei tawh lutuk...remchan chuan, la post ngei2 ang.
Written by Blueberry, 2042 days permalink
0
0
BW, thlalak chu i lo ngaihven peih chuan a tihchi viau ang. Sure lo po'n ngei ngei aw.
Written by Aryan, 2042 days permalink
0
0
mizo te balh zia! lol. Hmanlai a mizo te chauh nilo hnamdang , english ho te pawh an balh thin zia an sawi ve fo asin. Kum khatah vawihnih khat vel bak an in bual biklo ni awm tak ani. Kan professor sawi ka hriat reng chu an rimchhe thei lutuk a Puithiam ho hian mi rimchhe thup nan ser leh serthlum hawng hi an hum a mi bula an awm apiangin an sawr thin a ti.
Written by moimoi, 2042 days permalink
0
0
Mary Winchester (Zoluti) pa hi James Winchester a ni a, a nu hi kan hre lar vak lo. Tun hnai lawka Pu Lalhruaitluanga Ralte lehkhabu ZORAM VARTIAN tihah khan a chanchin chiang taka ziak lan a ni a.

Zoluti nu hi Meitei a ni daih thung a, a hming chu Mira-i a ni. 1857 Sepoy Mutiny (tunah First War of Indian Independence)lai khan ni khat chu Mira-i hian Silchar-ah kanpuah (faibar kan) a zuar a. Hetih lai tak hian silai puak thawm a lo awm a, mi an ralkhel a, an tlanchhe chum chum a. Mira-i tihngaihna hre lo chuan James Winchester-a inah inhumhimna a zawng ta ringawt a. Khuain a thim hnan avangin a riak ta nghe nghe a.

Hetih lai hian Meitei ho hian Sapho hi an duh lo hle a, chutia sap pa ina a riak chu bawlhhlawhah an ngai a, an thinhrik ta a. Mira-i hrehawm ti lutuk chuan Barak luipuia zuan thlaka intihhlum a tum a. James Winchester hian a dinhmun hrehawmzia hriain a khawngaih a, Syhlet Pastor hnenah hruaiin baptisma a chantir a, nupuiah a nei zui ta a ni.

Kum 1907-ah Sap Upa khan Challiana leh Chuautera te sapramah a hruai a, Zoluti hi an zu hmu a, an inah te lengin an riahchilh a. Kum 1912-ah Dr. Fraser-an R. Dala a hruai leh bawk a, ani pawh hian London-a thla 6 a cham chhungin Zoluti te chhungkua hi a tlawh bawk a ni.

(Zoram Vartian lehkhabuah hian Bung 2-na, phek 32-77 chu Zoluti chanchin vek a ni a, a ngaihnawm khawp mai).
Written by Blueberry, 2042 days permalink
0
0
Thanks moi2,a ngaihnawm hle mai. Zoram Vartian chu chhiar ve chi tak a ni chu mole.
Written by Mozart, 2042 days permalink
0
0
CHHUT HNIHNA THUHMAHRUAI -

He lehkhabu hi chumikhami kumah bu chuti zat chhut a ni a, Rin ai takin mipuiin an lo hlut a,Mak tak maiin a zo duak mai a Kar lovah lei tur a awm ta lova, Thriantha te leh Zoram hmun hrang hrang atangin chhuah leh tura ngenna a nasat em avangin kan han ti chhuak leh a ni..
(an ti tlangpui thin.. mak tak maiin)
Written by Valmawia, 2042 days permalink
0
0
A mantu Bengkhuaia te unau hi an huaisen khawp mai. Bengkhuaia hming dik tak hi Lalsahulha a ni a. A pa Lalpuithanga hi hi huaisen tak leh sa lakah pawh tlan chhe ngai lo mi a nih avangin chumi hming chawia Bengkhuaia hming hi phuah a ni awm e. Bengkhuaia unau Sangvunga pawh hian a unaupa Bengkhuaia kaihza a veng hneh hle. Chhim leh Hmar indo lai khan an la naupang deuh a, a pa Lalpuithanga unau bakah Lalpuiliana te an tang ho a, Hmar lamah Vuta fate leh Vanhnuailiana fate an tang ho a, Lalpuithang, lema, a lem a lem a, tih hi a lo chhuah phah nghe nghe.

An mi run zingah Pawih pakhat sahhlum a tumna lamah a ma beng a satthla ta hlauh mai a, chutia lal meuhvin a beng a satthla ta chu a lo lar ta hle mai a. Bengkhuaia tiin an koh phah ta a ni.

Mary Winchester pa te an run tum pawh hian a unaupa Sangvunga te ho nen an ni a. An hlawhtling hle nghe nghe.

Bengkhuaia khua hi an tam thin hle a, zawlbuk pawh pasarih lai an nei thin tih a nia.

Mizo Lal zingah a ropui ber ni mah suh se, a ropui pawl tak zawng a ni ngei e. An thiam ang tawk leh an theih ang tawka Zoram hum an tum dan hi thangtharte tan a hlu ngawt mai.
Written by superstarring, 2041 days permalink
0
0
Bengkhuaia te chanchin chu ron chhuah la..a sei deuh leh part in i then mai a nga :)
Written by superstarring, 2042 days permalink
0
0
va ngaihnomin va bengvar thlak ve le

Vai pasal nei hmasa ber hi Mauruangi a ni na nge? lol
Written by Dave, 2042 days permalink
0
0
Bingtaii a lawm nei hmasa chu. Daiah an paih mai pawh a.
Written by superstarring, 2041 days permalink
0
0
Bingtaii te chuan a nei hman lo a ni lom ni? a nei tur an kal pui a ni lom ni?